Муҳиддин Кабирӣ, раиси Паймони миллӣ, эътилофи се созмони мухолиф, рӯзи 3-юми октябр дар нишасти Созмони Амнияту Ҳамкорӣ дар Аврупо гуфт, "дар чанд соли охир садҳо мухолиф, рӯзноманигор, ҳуқуқшинос ва шаҳрванди одиро бо иттиҳоми сохтаи марбут ба терроризму ифротгароӣ зиндонӣ карданд."

Дар ҳоле ки, ба қавли ӯ, "сабабҳои асосии пайдоиш ва густариши ифротгароӣ, аз қабили бекорӣ, фасод, идораи хонаводагии кишвар ва набудани озодиҳо то ҳол ҳалношуда мондаанд".

Муаззама Қодирова, ҳуқуқдони тоҷик дар Аврупо, гуфт, ҳукумати Тоҷикистон бо истифода аз мубориза ба зидди терроризму тундгароӣ фаъолонро дар кишварҳои дигар низ боздошту истирдод ва муҷозот мекунад.

Вай ба созмонҳои байнулмилалӣ пешниҳод кардааст, ки бо ёрии САҲА дар Тоҷикистон як маркази назоратӣ (мониторинг) ба роҳ монанд.

"Мақомоти Тоҷикистон бо таъқибу боздошти наздикон ба мухолифон ва фаъолони маданӣ фишор меоранд. Аз ҷумла, Шавкати Муҳаммад ва Алим Шерзамонов дучори чунин фишорҳо шуданд," -- гуфт Муаззама Қодирова.

Нишасти Созмони Амният ва Ҳамкорӣ дар Аврупо дар шаҳри Варшава аз 30-юми сентябр ҷараён дорад. Намояндаҳои ҳукумати Тоҷикистон ё коршиносони тарафдори онҳо дар ҳузур надоранд. Мавқеи расмии Душанбе ба изҳороти намояндагони мухолифон маълум нест.

Як моҳ баъди ҷорӣ шудани ҷазои ҷиноӣ барои истифодаи ғайриқонунии барқ дар Тоҷикистон, додситони кулл Ҳабибулло Воҳидзода аз сохтоҳои ҳифзи қонуни кишвар даъват намуд, ки барои мубориза бо ин мушкил сафарбар шаванд. Мавзӯи асосии ҷаласаи шӯрои ҳамоҳангсози фаъолияти мақомоти ҳифзи ҳуқуқи Тоҷикистон рӯзи 6 май ҳам ҳамин будааст.

Дафтари матбуоти додситонии кулл навишт, дар ин ҷаласа супориши президент оид ба пешгирии истифодаи ғайриқонунии неруи барқ ва талафоти аз меъёр зиёди он баррасӣ гардид ва ба сохторҳои ҳифзи қонун дастур дода шуд, ки барои иҷрои ин талабот даст ба кор шаванд.

Ин хабар дар ҳолест, ки дар як моҳи ахир хабарҳо аз кунҷу канори Тоҷикистон дар бораи ба ҷавобгарӣ кашидани шудани сокинон барои истифодаи ғайриқонунии барқ ҳарчи бештар нашр мешаванд. Бар асоси бархе хабарҳо аз минтақаҳои кишвар, мақомоти ҳифзи қонун дар маҳалҳо барои татбиқи дастури президент рейду корҳои назоратӣ ба роҳ мондаанд.

Бар асоси иловаҳо ба Кодекси ҷиноии Тоҷикистон аз моҳи апрел, барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндон пешбинӣ шудааст.

Тоҷикистон давоми даҳсолаҳо дар ҳолати бӯҳрони энержӣ ба сар мебарад, қимати барқ барои аҳолӣ ва корхонаҳо гарон гуфта мешавад, вале маълум нест то куҷо таъқиби ҷиноии шаҳрвандон барои барқи дуздӣ барои сабуктар шудани ин мушкил мусоидат мекунад.

Дар мулоқот бо президенти ИМА Доналд Трамп дар Кохи Сафед рӯзи 6 май, нахуствазири Канада Марк Карни гуфт, “Канада фурӯхта намешавад”. Ин посухи Карни дар ҷавоб ба суханҳои Трамп буд, ки гуфт, ба ҳайати ИМА дохил шудани Канада “як издивоҷи хубе мешуд. “Ҳаргиз нагӯй ҳаргиз”, гуфт Трамп ба Марк Карни.

Бо вуҷуди ихтилофҳои рӯшан, ҳарду кишвар дар ниҳоят аз ҷараёни гуфтугӯ изҳори қаноатмандӣ карданд. Марк Карни, ки бо ҳизби либералиаш дар интихоботи ахир таҳти шиори муқовимат ба нақшаҳои Доналд Трамп дар нисбати Канада ғалаба ба даст овард, мулоқоти гузаштаро “созанда” номид. Трамп изҳори умедворӣ кард, ки ҳамкориҳои байни ду раҳбар танготанг хоҳанд шуд.

Дар мулоқоти гузашта Трампу Карни масоили вобаста ба таҳаввулоти ҷаҳон, аз ҷумла, ҳуҷуми Русия ба хоки Украина ва муносибатҳо бо Эронро баррасӣ карданд. Яке дигар аз мавзӯъҳои гуфтугӯи онҳо додугирифтҳои тиҷоратӣ буд, ки баъди ҷорӣ кардани тарруфаҳои азими амрикоӣ ба аксар маҳсулоти содиротии Канада ва ҳам тарруфаҳои ҷавобии он кишвар ба Амрико бисёр мураккаб шудааст.

Дар ин мавзӯъ ҳеҷ мувофиқае ҳосил нашуд, вале нахуствазири Канада аз омодагӣ ба музокирот ба хотири бекор кардани тарруфаҳои тиҷоратӣ ва дастёбӣ ба созиши нави байни ин ду шарики тиҷоратӣ хабар дод.

Рӯзи 6 май дар Новосибирск нерӯҳои амниятӣ ҳамроҳ бо созмони миллатгарои «Русская община» ва ё «Ҷомеаи русҳо» дар бозори "Мандарин" рейд гузаронданд. Корбарони Радиои Озодӣ аз ҷараёни ин рейд навореро фиристоданд, ки дар он дида мешавад, чӣ гуна афроди ниқобпӯш муҳоҷиронро дар замин хобондаву бераҳмона калтаккорӣ мекунанд.

Дар ҳоле, ки, ба гуфтаи мусоҳибони мо, ин муҳоҷирон ҳама ҳуҷҷатҳояшон расмӣ буда, қонунӣ фаъолият доранд. Ҳамсӯҳбатони мо мегӯянд, бозори мазкур тақрибан панҷ моҳи пеш ба фаъолият оғоз карда, дар он ҷо муҳоҷирони узбеку тоҷик ва қирғизу озарбойҷонӣ кор мекунанд.

Ин бори аввал нест, ки ҳангоми рейдҳо дар Русия муҳоҷирон бераҳмона латтукӯб мешаванд. Ҳафтаи равон Вазорати корҳои хориҷии Ӯзбекистон аз зиёд шудани ҳолатҳои бадрафторӣ нисбат ба шаҳрвандони ин кишвар изҳори нигаронӣ намуда дар ин робита сафири Русияро барои сӯҳбат даъват кард.

Ҳамчунин моҳи гузашта тафтиши таҳқиромези муҳоҷирони қирғиз дар ҳаммоми Маскав вокуниши ҷиддии вакилони Қирғизистонро ба бор овард.

Иёлоти Муттаҳидаи Амрико ва ҳусиҳои ҳоким бар Яман дар бораи оташбас ба созиш расидаанд. Ин созиш бо миёнаравии кишвари Умон ба даст омадааст.

Ба асоси ин тавофуқ, Амрико ва ҳусиҳо ба якдигар ҳамла намекунанд. Аз ҷумла, ҳусиҳо қавл додаанд, ки ба киштиҳои амрикоӣ дар Баҳри Сурх ҳамла намекунанд.

Вале дар изҳороти Вазорати корҳои хориҷии Умон, ки миёнарави ин музокирот аст, дар бораи қатъи ҳамлаи ҳусиҳо ба Исроил чизе ишора нашудааст.

Пеш аз эълони ин хабар, Доналд Трамп гуфт, Амрико дигар ҳусиҳоро бамборон намекунад.

Иёлоти Муттаҳида рӯзи 15-уми марти имсол ҳамларо алайҳи шӯришиёни ҳусии Яман сар кард.

Амрико шӯришиёни ҳусиро як гурӯҳи террористӣ медонад.

Ҳукумати Тоҷикистон дастур додааст, ки то 30 дарсади мошинҳо дар кишвар барқӣ ё электромобил бошанд.

Рӯзномаи расмии "Ҷумҳурият" навиштааст, ин кор бояд то соли 2028 анҷом шавад.

Ба иттилои расмӣ, танҳо давоми се моҳи имсол ба кишвар 6047 нақлиёти барқӣ ворид шудааст.

То имрӯз шумораи умумии нақлиётҳои барқӣ дар кишвар 27 ҳазор будааст.

Аз соли 2022 ворид кардани нақлиёти барқӣ ба Тоҷикистон аз андоз ва боҷи гумрукӣ озод аст.

Баъди ин кор таваҷҷуҳ ба мошинҳои барқӣ зиёд шуд, аммо маҳдудият барқ дар минтақаҳо мушкили дигареро барои соҳибони ин нақлиётҳо ба вуҷуд овардааст.

Баъзе сокинони шаҳри Исфара дар шимоли Тоҷикистон мегӯянд, омӯзгорон дар вақти гардиши хона ба хона, аз онҳо забонхат гирифтаанд, ки фарзандонашонро аз чанд кор манъ кунанд.

Аз ҷумла, аз волидайн талаб шудааст, ки фарзандони мактабхонашонро аз рафтан "ба таълимоти динии ғайрирасмӣ, рафтан ба масҷиди панҷвақта ва намози ҷумъа", боздоранд.

Қонуни масъулияти падару модар ҳам рафтани наврасони то синни 18-ро ба масҷид манъ мекунад. Инчунин падару модарон муваззаф шудаанд, ки баъди соати 18 ба писаронашон иҷозаи баромадан аз хона надиҳанд. Ба шахсони шубҳанок ва бегона иртибот надоштан ва ба мактаб наовардани телефони мобилӣ, аз талабҳои дигар аз волидайн будааст.

Як сокини деҳаи Наймани шаҳри Исфара нусхаи ин забонхатро ба Радиои Озодӣ фиристода гуфт, аз онҳо талаб шудааст, ки зери ин забонхат имзо гузоранд. Дар сурати иҷро накардани ин дархостҳо, волидайн бар асоси қонуни масъулияти падару модар муҷозот мешудаанд.

Намояндагони идораи маорифи шаҳри Исфара нахостанд дар ин бора сӯҳбат кунанд. Ҳакима Атохонзода, сардори Раёсати маорифи Исфара дар сӯҳбати телефонӣ ба Радиои Озодӣ гуфт, "умуман инхел гап нест" ва гӯширо гузошт.

Ҷинояткорӣ дар миёни ноболиғон яке аз масъалаҳои нигаронкунанда барои мақомоти Тоҷикистон мебошад. Аммо маълум нест, ки бо усули "гардиши хона ба хона", ва забонхат гирифтан аз волидайн, то куҷо ҷинояткорӣ дар миёни ноболиғон метавонад коҳиш ёбад.

Дар овоздиҳии бори дуюм аъзои бундестаг номзадии Фридрих Мертсро дар мақоми садри аъзами Олмон пазируфтанд. Барои номзадии ӯ ин навбат 325 вакил посухи мусбат доданд. Дар ин бора Deutsche Welle хабар додааст.

Барои бурдани интихобот раъйи мусбати 316 вакил зарур аст. Рӯзи сешанбе дар аввалин овоздиҳӣ ба тарафдорӣ аз Мертс 310 вакил овоз дод, ки ин нокофӣ мебошад.

Чунин натиҷаро касе интизор набуд ва дар пай дар кори ҷаласаи парлумон танаффус эълон шуд. Баъди ин раҳбари ҳизби Сотсиал-демократии Олмон Ларс Клингбайл хабар дод, ки ҳамаи ҳизбҳо, ба истиснои “Алтернативаи Олмон” ба хулосае омаданд, ки овоздиҳии такрорӣ бояд худи ҳамин рӯз барпо шавад.

Натиҷаҳои овоздиҳии нахустинро ҳизби ростгарои популистии “Алтернатива барои Олмон” истиқбол кард.

Рӯзи гузашта Эътилофи марказу ростгарои демократҳои масеҳӣ ва муҳофизакор ҳамроҳ бо ҳизби сотсиал-демократӣ созишномаи мусолеҳаомезеро имзо карданд. Бар асоси ин созиш, сиёсати муҳоҷират сахттар шуда хароҷот дар барномаҳои дифоӣ афзоиш меёбад. Инчунин дар ин санад гуфта шудааст, ки пуштибонии Украина идома хоҳад ёфт.

Ҳукумати Амрико гуфт, ба муҳоҷирони ғайриқонунӣ, ки ихтиёран ин кишварро тарк мекунанд, 1000-долларӣ мепардозад. Дар ин бора Вазорати умури дохилии Амрико хабар додааст.

Барои гирифтани ин пул муҳоҷирон бояд дар барномаи махсуси CBP Home сабти ном кунанд. Сипас аз Амрико берун шаванду тасдиқ намоянд, ки кишварро тарк кардаанд.

Пас аз ин, ба онҳо 1000 доллар дода мешавад. Илова бар ин, дар сурати ихроҷи ихтиёрӣ, онҳо метавонанд ба кӯмаки мақомоти Амрико дар омода кардани ҳуҷҷатҳои зарурӣ ва дарёфти маблағ барои харидани билети ҳавопаймо умед банданд.

Вазорати умури дохилии Амрико интизор дорад, ки аз ин роҳ харҷи берун кардани муҳоҷирон то 70 дарсад кам мешавад. Ҳафтаи гузашта мақомоти ИМА 131 шаҳрванди Узбекистон, Қазоқистон ва Қирғизистонро ба Тошканд ихроҷ карданд.

То кунун исми 149 шаҳрванди Тоҷикистон ҳам ба рӯйхати онҳое ворид шудааст, ки бояд аз Иёлоти Муттаҳидаи Амрико ихроҷ шаванд.

Вазорати маорифи Тоҷикистон мегӯяд, дар паи боздиди ғайриногаҳонии вазир Раҳим Саидзода ба чанд муассисаи таълимӣ дар ноҳияи Ҳисор ҳолати риққатбори мактабҳо, ҳузури нокофии шогирдон дар дарсҳо, корношоямии мизу курсиҳо дар синфхонаҳо ва дигар мушкилотро бармало кард. Дар бораи боздиди вазир дар санаи 5 май ба ноҳияи Ҳисор сомонаи Фейсбукии Вазорати маорифи Тоҷикистон хабар додааст.

Дар изҳороти вазорат, аз ҷумла, гуфта мешавад, ки “аз камтаваҷҷуҳӣ ва саҳлангории шуъбаи маориф ва директорони муассисаҳо корҳои таълимию тарбиявӣ ва ободонӣ дар сатҳи зарурӣ ба роҳ монда нашуда, интизоми меҳнат ва иштироки хонандагон дар дарс ба таври ҷиддӣ нигаронкунанда мебошанд”.

Ҳангоми боздиди аз пеш эълоннашудаи вазир дар мактаби рақами 29 мудир ва муовини мудир оид ба хоҷагидорӣ “бе сабабҳои узрнок” дар сари кор ҳузур надоштанд. Тахминан чил дар сади хонандагон дар дарс набуданд ва шогирдон танҳо нисфи китобҳои дарсиро ба синф оварда буданд, менависад вазорат.

“Аз шумораи 22 нафар хонанда, ягон нафар ба одитарин саволҳои пешниҳодшуда, аз ҷумла, муаррифии худ ба забонҳои русӣ ва англисӣ, муодилаҳои одӣ аз синфи 7 ва технологияи иттилоотӣ чист, ҷавоб гардонида натавонистанд», омадааст дар изҳорот.

Вазири маорифи Тоҷикистон Раҳим Саидзода 5 май дар як боздиди ногаҳониаш ба ноҳияи Ҳисор бо ҳолати риққатовари мактабҳои миёна шинос шуд. Акси ин мактабҳоро саҳифаи Фейсбукии вазорати маориф нашр намуд.

Интиқоди муҳими вазорат, инчунин ба шароити синфхонаҳо рабт дорад. “Ҳолати синфи мазкур ва дар умум, муассиса ба одитарин талаботи санитарию гигиенӣ ҷавобгӯй набудааст”, омадааст дар изҳороти вазорат.

Маълум нест маъмурияти ин мактаб ба интиқоди вазорат чӣ назар дорад.

Интиқод аз шароити мактабҳои Тоҷикистон, бахусус дар манотиқи дурдасту деҳот бисёр садо додааст ва мунтақидон гоҳо масъулони соҳаи маорифро барои таваҷҷӯҳи нокофӣ ба эҳтиёҷоти ин соҳа ва таъминоти нопурраи шогирдон бо китобу васоили дигари мактабӣ танқид мекунанд.

Соҳаи маорифро мақомоти ҳифзи қонун яке аз фасодзадатарин дар миёни дигар бахшҳо меноманд.

Дар овоздиҳии нахустини парлумон барои интихоби садри нави аъзами Олмон, ки рӯзи 6 май барпо шуд, Фридрих Мертс натавонист овози заруриро барои ғалаба ба даст оварад.

Дар овоздиҳии пинҳонӣ ба ҷонибдории Мертс танҳо 310 нафар овоз доданд. Барои пирӯзӣ ҳадди аққал 316 овози тарафдор лозим аст. 307 нафар мухолиф баромаданд.

Ин дар ҳолест, ки Эътилофи марказу ростгарои демократҳои масеҳӣ ва муҳофизакор, ки Мертс раҳбари онҳо мебошад, ҳамроҳ бо сотсиал-демократҳои ҳамэътилофашон дар бундестаг аксариятро ташкил медиҳанд ва шуморашон 328 нафар мебошад.

Натиҷаҳои овоздиҳӣ ба ин маъност, ки дар миёни аъзои ин эътилоф ҳам мухолифони Мертс ҳастанд. Чунин натиҷаро интизор надоштанд. Дар ҷаласаи бундестаг танаффус эълон шудааст.

Овоздиҳии такрорӣ дар рӯзҳои наздик барпо мешавад ва дар маҷмӯъ барои ин 14 рӯз фурсат дода мешавад.

Мақомоти Украина эълон карданд, ки сокинони ду шаҳри воқеъ дар наздикии Русия – Белополе ва Ворожба ба ҷои амн кӯч дода мешаванд. Михаил Мелник, раиси ноҳияи Суми гуфт, ки автобусҳо барои бурдани мардум фиристода мешаванд. Сабаби ин қарор нашр намешавад.

Вале як рӯз пеш, 5 май додситонии вилоят гуфт, ки артиши Русия ин ду шаҳрро беист оташборон карда ва дар натиҷа се сокини маҳаллӣ кушта шуданд.

Белополе ва Ворожба дар ҳамсоягии вилояти Курски Русия ҷойгиранд. Рӯзи душанбе манбаъҳои русӣ гуфтанд, ки дар ин минтақаи то шурӯи ҷанг сеҷамъият ҷангҳои сахте ҷараён доранд ва низомиёни украинӣ аз сарҳад убур карданд. Маскав ва Киев ҳанӯз расман чизе намегӯянд.

Моҳи апрел сарфармондеҳи қувваҳои мусаллаҳи Украина Александр Сирский дар сӯҳбат бо нашрияе гуфт, ки артиши Русия ҳуҷумро ба вилояти Суми шиддат мебахшад, вале аз он замон то кунун дар бораи тағйирот дар хати ҷабҳа иттилое нашр нашудааст.

Шоми рӯзи душанбе Василий Худяков, раиси ҷамоати деҳоти Глушковои вилояти Курск дар бораи берункашии аҳолӣ ба ҷои амн хабар дод. Ӯ инро ба “сангинтар шудани вазъ” рабт додааст.

Дар пайи ҳамлаи афроди ношинос ба нозирони роҳ дар шаҳри Махачқалъаи Доғистон, 3 корманди пулис кушта шудаанд. Ҳодиса 5-уми май рух дод.

Ба иттилои Вазорати тандурустии Доғистон, дар ҷараёни тирпаронӣ панҷ каси дигар, аз ҷумла, ду корманди пулис ва се шаҳрванди мулкӣ, захмӣ шуданд.

Дар миёни захмиён як духтари 17-сола ҳам ҳаст. Лаҳзаи тирпарронӣ дар навор сабт шудааст. Дар аввал гузориш шуд, ки чор нафар ба сӯи нозирони роҳ оташ кушодаанд.

Дертар Вазорати корҳои дохилии Русия эълон кард, ки ҳамлаварон ду кас буданд ва кушта шудаанд.

Дар бораи сабабҳои даст ба ин кор задани ҳамлаварон чизе гуфта нашудааст.

Ду мақомдори Исроил эълон карданд, ки ҳукумати ин кишвар тарҳи тасарруфи пурраи Навори Ғазза ва мондан дар ин минтақа барои муддати номуайянро, пазируфтааст.

Вазирони кобинаи Исроил субҳи душанбеи 5-уми май тарҳи тасарруфи Навори Ғаззаро тасвиб карданд. Ин лоиҳа пас аз он қабул шуд, ки фармондеҳи артиши Исроил гуфт, даҳҳо ҳазор сарбози захираро фаро хондааст.

Ба гуфтаи мақомоти исроилӣ, ҳадаф аз тарҳи нав, шикасти гуруҳи "Ҳамос" ва озод кардани гаравгонҳои боқимонда аст. Амрико ва Иттиҳоди Аврупо "Ҳамос"-ро гурӯҳи террористӣ медонанд.

Тибқи иттилои ахир, 59 гаравгони исроилӣ дар дасти "Ҳамос" мондаанд ва гуфта мешавад, танҳо 24 тани онҳо зиндаанд. Сахтар шудани ҷанг дар Ғазза эҳтимол буҳрони инсонӣ дар ин минтақаро вазнинтар мекунад.

Дар ҳамин ҳол, хабаргузории Ассошиэйтед Пресс аз қавли мақомоти исроилӣ гузориш додааст, ки тарҳи қабулкардаи ҳукумати Исроил, "тасарруфи Навори Ғазза ва мондан дар минтақа"-ро пешбинӣ мекунад.

Ин тарҳ ҳамчунон тақсими кӯмакҳои башардӯстона аз сӯи намояндагони "Ҳамос"-ро манъ мекунад. Исроил бовар дорад, ки ин кор ҳокимияти "Ҳамос"-ро дар Ғазза тақвият медиҳад.

Музокирот барои оташбас ва бозгардонии гаравгонҳо аз Навори Ғазза натиҷаи дилхоҳ надодааст.

Эҳтимол меравад, дар рӯзҳои таҷлили Иди ғалаба дар ҳудуди Маскав дастрасӣ ба алоқаи мобилӣ ва интернет маҳдуд шавад. Дар ин бора рӯзи 5 май тавассути Системаи ягонаи давлатии огоҳонӣ аз ҳолатҳои фавқулодда маълумот нашр шудааст.

Аз ин пеш хабаргузории ТАСС дар бораи вуҷуди мушкил ё маҳдудидият дар алоқаи мобил дар шаҳр ва вилояти Маскав хабар дод. Корбарон гуфтанд, чунин мушкил ба ҳангоми истифода аз хадамоти ширкатҳои "Билайн", МТС ва T2 эҳсос мешавад.

Ширкатҳо ба ТАСС гуфтаанд, ки мушкил ба онҳо бастагӣ надорад. Блогерҳо гуфтанд, ки маҳдудият ба далелҳои амниятӣ ва бо мақсади таъмини бехатарии раҳбарони кишварҳое рабт дорад, ки рӯзи 9 май аз паради ҳарбӣ тамошо мекунанд.

Интизор меравад, ки аз Тоҷикистон президент Эмомалӣ Раҳмон ҳам дар ин чорабинӣ иштирок хоҳад кард. Дар миёни дигар меҳмонҳо сафари раҳбарони Чин, Бразилия ва Куба ҳам пешбинӣ мешавад. Раҳбари Словакия Роберт Фитсо ҳам сафарашро ба Маскав тасдиқ кард.

Пеш аз он ӯ суханҳои президенти Украина Владимир Зеленскийро чун “таҳдид” танқид кард, ки гӯё гуфтааст, наметавонад амнияти раҳбарони хориҷиро ба ҳангоми сафарашон ба Маскав кафолат диҳад. Дар асл Зеленский пешниҳоди оташбаси серӯзаи Путин ба муносибати Иди Ғалабаро рад кард ва онро берӯёна номид.

Зеленский гуфт, ки Украина наметавонад барои ҳодисаҳо дар Русия, ки он ҷо метавонад ҳама гуна тавтеа рух диҳад, ҷавобгар бошад. Зеленский ҳеҷ гоҳ таҳдид накардааст, ки дар ҷараёни ҷашни Иди Ғалаба ба Маскав бо паҳпод ҳамла хоҳад кард.

Полиси Маскав огоҳ кардааст, ки истифода аз маводи тарфгарӣ ва паҳподҳо дар ҷараёни омодагӣ ба иди 9 май ҷавобгарии ҷиноӣ ва маъмурӣ дорад.

Полиси шаҳри Душанбе аз ҳабси пешакии зане хабар дод, ки ба навиштааш, бо вуҷуди огаҳиву ҳушдори аз ин пеш, дубора ба фолбинӣ машғул шуда, инчунин гӯё бо муштариёнаш робитаҳои маҳрамона барпо мекардааст.

Полиси шаҳри Душанбе дар Телеграм-каналаш рӯзи 5 май гуфт, зани муттаҳам Сурайё Наҷмуддиноваи 44-сола - сокини ноҳияи Рӯдакӣ мебошад ва нисбати ӯ протоколи маъмурӣ тартиб дода шудааст.

Дар шарҳи ин қазия полис мегӯяд, зан “бо суистифода аз ҳиссиёт ва боварҳои динӣ бо ҷавонони муроҷиаткунанда амалҳои шаҳвонӣ анҷом медод”. Гумонбар аз рӯи моддаи 142 иловаи 1 Кодекси ҷиноии Тоҷикистон, яъне “Алоқаи ҷинсӣ, дигар ҳаракатҳои хусусияти шаҳвонидошта ё ҳаракатҳои бадахлоқона бо суиистифода аз ҳиссиёт ва боварии динӣ” ба ҷавобгарӣ кашида шудааст.

Маълум нест назари худи Наҷмуддинова ба ин иттиҳом чӣ аст ва то куҷо ӯ бо вакили дифоъ таъмин шудааст.

Ин бори аввал нест, ки мақомоти ҳифзи қонун наворҳои пинҳонӣ сабтшуда аз хонаҳои нафаронеро нашр мекунанд, ки худро ба унвони фолбин ё табиби мардумӣ муаррифӣ мекунанд. Дар бисёр ҳолатҳо нашри чунин наворҳо бо ҳадафи бадномкунии ходимони дин ҳам таҳия мешаванд.